ಮನಸಿದ್ದಲ್ಲಿ ಮಾರ್ಗ

ಒಂದೊಮ್ಮೆ ಹಣದ ಕೊರತೆಯಿಂದಾಗಿ ಮನೆಯನ್ನು ನಿಭಾಯಿಸಲು ಸಾಧ್ಯವಾಗದ ಕ್ಲಿಷ್ಟಕರ ಪರಿಸ್ಥಿತಿಯಲ್ಲಿದ್ದ ದೀಪಿಕಾ, ಇಂದು ಲೆಕ್ಕ ಪರಿಶೋಧಕಳಾಗಿ ಸರ್ಕಾರದ ಬಜೆಟ್ಟಿನ ಉಸ್ತುವಾರಿ ನೋಡಿಕೊಳ್ಳುತ್ತಿದ್ದಾಳೆ. ಆದರೆ ಈ ಯಶೋಗಾಥೆ ಬರೆಯುವುದು ದೀಪಿಕಾಳಿಗೆ ಸುಲಭದ ಕಾರ್ಯವಾಗಿರಲಿಲ್ಲ. ಎಡೆಬಿಡದ ಕೂಲಿ ಕೆಲಸದಿಂದ ತಂದೆ ಖಾಯಿಲೆಗೆ ತುತ್ತಾಗಿ, ತಾಯಿ ಹೊಸಿಲನ್ನೇ ದಾಟದಂತಾಯಿತು. ಮನೆಯ ಚಿಕ್ಕದೊಂದು ಕೋಣೆಯಲ್ಲಿ ಕಿರಿಯರಿಗೂ ಟ್ಯೂಶನ್ ನಡೆಸುತ್ತಾ, ತನ್ನ ಅಧ್ಯಯನವನ್ನೂ ಮುಂದುವರೆಸುವುದು ಆಕೆಗೆ ತುಂಬಾ ಕಷ್ಟಕರವಾಗಿತ್ತು. ಆದರೆ ದೀಪಿಕಾಳ ಕನಸುಗಳು ಬೆಟ್ಟದಷ್ಟಿದ್ದವು. ಹಾಗಾಗಿ ಅವಳು ಸ್ಪರ್ಧಾತ್ಮಕ ಪರೀಕ್ಷೆಗಳ ತಯಾರಿ ನಡೆಸಿದಳು. ಆಗ ದೀಪಿಕಾಳಂಥ ಹುಡುಗಿಯರಿಗೆಂದೇ, ಕಳೆದ 17 ವರ್ಷಗಳಿಂದ ನರೋಡಾದ ಮಹಿಳಾ ಸ್ವಸಹಾಯ ಸಂಘ ನಡೆಸಿಕೊಂಡು ಬಂದಿರುವ ಗ್ರಂಥಾಲಯದ ಸಹಾಯವೂ ಆಕೆಗೆ ದೊರಕಿತು.

ಮೊದಲಿನಿಂದಲೂ ಸಂಘಕ್ಕೆ ಮಾರ್ಗದರ್ಶನ ಮಾಡುತ್ತಿರುವ ಕಿರಣ್ ಜೀ ಅವರ ಪ್ರಕಾರ-- ಇಲ್ಲಿ ಮಹಿಳೆಯರ ಆರೋಗ್ಯದ ಬಗ್ಗೆಯೂ ಸಂಪೂರ್ಣ ಕಾಳಜಿ ವಹಿಸಲಾಗುತ್ತದೆ. ಇಲ್ಲಿ ಸ್ತನಕ್ಯಾನ್ಸರ್ ಹಾಗೂ ಕ್ಷಯರೋಗದಂಥ ಖಾಯಿಲೆಗಳಿಗೆ ಉಚಿತವಾಗಿ ವೈದ್ಯಕೀಯ ಶಿಬಿರಗಳನ್ನು ಆಯೋಜಿಸಲಾಗುತ್ತದೆ. ಅಂತೆಯೇ, ನಗರದ ಪ್ರಸಿದ್ಧ ಆಹಾರತಜ್ಞರು ಇಲ್ಲಿಗೆ ಬಂದು, ಕಡಿಮೆ ವೆಚ್ಚದಲ್ಲಿ ಯಾವ ರೀತಿಯ ಆಹಾರ ಸೇವಿಸುವ ಮೂಲಕ ಆರೋಗ್ಯವಾಗಿರಬಹುದು ಎಂಬ ಬಗ್ಗೆಯೂ ಮಾಹಿತಿ ನೀಡುವರು. ಹಾಗೆಯೇ ಸಮಿತಿಯ ವತಿಯಿಂದ ವಾಟರ್ ಬೆಡ್, ಗಾಲಿಕುರ್ಚಿ, ಆಮ್ಲಜನಕದ ಸಿಲೆಂಡರುಗಳಂಥ ವೈದ್ಯಕೀಯ ಸಲಕರಣೆಗಳನ್ನು ಅಗತ್ಯಾನುಸಾರ ಮಹಿಳೆಯರಿಗೆ ಉಚಿತವಾಗಿ ನೀಡಲಾಗುವುದು. ಇಂದು ಮಹಿಳೆಯರಿಂದ- ಮಹಿಳೆಯರಿಗಾಗಿ-ಮಹಿಳೆಯರದ್ದೇ ಎನ್ನುವಂತೆ ಈ ಸಂಘ ಬೆಳೆದು ನಿಂತಿದೆ. ಇದರ ಎಲ್ಲಾ ಉಸ್ತುವಾರಿಯನ್ನು ಈಗ ಸ್ವಯಂಸೇವಕರ ಕುಟುಂಬಗಳ ಮಹಿಳೆಯರೇ ನಿರ್ವಹಿಸುತ್ತಿದ್ದಾರೆ. ಸುನೀತಿ ಬೆನ್ ಪಟೇಲ್ ನೇತೃತ್ವದ 12 ಮಹಿಳೆಯರ ಸಮಿತಿಯು ಇದರ ಆಡಳಿತವನ್ನು ಅತ್ಯಂತ ಪರಿಣಾಮಕಾರಿಯಾಗಿ ನಡೆಸುತ್ತಿದೆ. ಇದರ ಹಣಕಾಸಿನ ವ್ಯವಹಾರವನ್ನು ಸಮಿತಿಯ ಟ್ರಸ್ಟಿಗಳು ನೋಡಿಕೊಳ್ಳುತ್ತಾರೆ. ಕೇವಲ ಒಂದು ಕೊಠಡಿಯಿಂದ ಪ್ರಾರಂಭವಾದ ಈ ಮಹಿಳಾ ಸ್ವಸಹಾಯ ಸಂಘವು ಇಂದು ಮೂರಂತಸ್ತಿನ ಕಟ್ಟಡವಾಗಿ ಬೆಳೆದಿದೆ. ಸೇವಾ ಇಂಟರ್ ನ್ಯಾಷನಲ್ ಮತ್ತು ಸೇವಾಭಾರತಿ ಸಂಸ್ಥೆಗಳ ಆರ್ಥಿಕ ನೆರವಿನಿಂದಲೇ ಸಂಘವು ಸ್ವಂತದ ಕಟ್ಟಡ ಹೊಂದಲು ಸಾಧ್ಯವಾಯಿತೆಂದು ಸುನೀತೀ ಜೀ ಕೃತಜ್ಞತೆಯಿಂದ ಸ್ಮರಿಸುತ್ತಾರೆ.

ತನ್ನಂತೆ ಇತರ ಹೆಣ್ಣುಮಕ್ಕಳೂ ಜೀವನದಲ್ಲಿ ಮುಂದೆ ಬರಲೆಂಬ ಆಶಯದೊಂದಿಗೆ ತರಬೇತುದಾರರಾಗಿ ದೀಪಿಕಾ ದುಡಿಯುತ್ತಿದ್ದಾರೆ.

ಸಂಪರ್ಕ - ಸುನೀತಿ ಪಟೇಲ್

ದೂರವಾಣಿ-09408840167